मकवानपुर– छिमेकीलाई कुटपिट गरी हत्या गरेको अभियोगमा मकवानपुर प्रहरीले एकजनालाई नियन्त्रणमा लिएको छ । मकवानपुरको उत्तरीक्षेत्रमा अवस्थित इन्द्रसरोवर गाउँपालिका–४ फाखेलबाट कुटपिट गरी हत्या गरेको आरोपमा आइतबार एकजनालाई मकवानपुर प्रहरीले पक्राउ गरेको हो ।
पक्राउ पर्नेमा गाउँपालिका–४, फाखेलका ३२ वर्षीय प्रदिप डिम्डुङ रहेको जिल्ला प्रहरी कार्यालय मकवानपुरका प्रहरी उपरीक्षक सुशीलसिं राठौरले जानकारी दिए । उनका अनुसार लेनदेनको विषयमा प्रदिप सहितको समूहको कुटाइबाट ४० वर्षीय जितबहादुर पाख्रीनको गम्भीर घाइते भएका थिए । गम्भीर घाइते पाख्रिनको ललितपुरस्थित स्टार अस्पतालमा उपचारको क्रममा शनिबार मृत्यु भएको थियो । ‘चैत १६ गते छिमेकीबीच लेनदेनको विषयमा लिएर कुटपिट गरिएको रहेछ । उपचारको क्रममा बिरामीको मृत्यु भएपछि हामीले पक्राउ गरेका हौं,’प्रहरी उपरीक्षक राठौरले भने । घटना बारे थप अनुसन्धान भइरहेको उनले बताए ।
