हेटौंडा । राप्रपा नेपालका अध्यक्ष एवं पूर्वउपप्रधान तथा गृहमन्त्री कमल थापाले देश बचाउन राजा र जनताको साझेदारी आवश्यक रहेको बताउनु भएकाे छ । शुक्रबार हेटौडामा आयोजित अगुवा कार्यकर्ता भेटघाटलाई सम्बोधन गर्दै अध्यक्ष थापाले राष्ट्रिय एकताको विषयमा राजनीतिक दलहरूको एटटै स्वर नहुँदा बाह्य शक्तिहरूले आक्रमण गर्ने गरेको बताउनुभयाे ।
उहाँले विदेशीहरूको ठूलो चलखेलले देशमा आर्थिक संकट उत्पन्न भएको विषम परिस्थितिमा पनि दलहरू विभाजित भएर एकअर्कालाई आरोप प्रत्यारोपमा लाग्नु स्वभाबिक नभएको बताउनुभयाे । अहिलेको अवस्थामा बिपी कोइरालाको मेलमिलाप नीति अवलम्बन गर्न नसक्दा राष्ट्रियता र प्रजातन्त्र खतरामा परेको उहाँले जिकिर गर्नुभयाे ।
देश बचाउन राजा र जनताको साझेदारी आवश्यक रहेको उहाँको भनाइ छ । प्रजातन्त्र दिवसका अवसरमा राज ज्ञानेन्द्रे दिएको सकारात्मक सन्देशलाई केही नेताहरूले कटाक्ष गरेको भन्दै यो संविधानले बिचार र स्वतन्त्रताको ग्यारेन्टी गरेकोले राजाका बिचारलाई अतिक्रमण गर्न खोज्नु गलत भएको टिप्पणी गर्नुभयाे ।
अहिले हिन्दु राष्ट्र र राजसंस्थाको पक्षमा लाखौँ जनताहरू लागिसकेको भन्दै उहाँले राजाको मन्तव्य कसैको विरुद्ध नभएको बताउनुभयाे । राजालाई दोष देखाएर आफ्ना गल्तीहरू ढाकछोप गर्न खोज्नेहरूलाई अब जनताले नछाड्ने भन्दै उहाँले लोकतन्त्रको नाममा लुटतन्त्र गर्न कसैलाई छुट नभएको बताउनुभयाे ।
अहिलेको प्रणालीले मुलुकको हित र रक्षा हुन नसक्ने भन्दै थापाले हिन्दु राष्ट्र र संवैधानिक राजसंस्था पुरस्थापना हुने समय आइसकेको दाबी गर्नुभयाे । विदेशी शक्तिहरूको प्रभाव देशमा परेकाले आफूहरू विस्थापित हुनुपरेको भन्दै उहाँले अब राप्रपाको एकता जरुरी भएको समेत बताउनुभयाे ।
