मकवानपुर – नेकपा एमालेका उपमहासचिब विष्णु रिमालले देशलाई निकास र विकास दिन एमालेको सरकार आउनुपर्ने बताउनुभएको छ । मदन भण्डारी फाउण्डेसन मकवानपुरद्धारा मंगलबार हेटौंडामा आयोजित “सामाजिक, आर्थिक रुपान्तरणमा जबज र मदन भण्डारी” बिषयक बिचार गोष्ठीमा बोल्दै उहाँले अहिले देश अप्ठ्यारो अवस्थाबाट गुज्रिरहेको बताउँदै देशलाई निकास र विकास दिन अब एमालेको सरकार आउनुपर्ने बताउनुभयो ।
मदन भण्डारी फाउण्डेसन मकवानपुरका अध्यक्ष तथा एमाले प्रदेश कमिटीका सदस्य रघुनाथ खुलालको अध्यक्षतामा भएको कार्यक्रममा उपमहासचिव रिमालले एमालेले समृद्ध नेपाल सुखी नेपानी बनाउन चाहेपनि काग्रेसले यसलाई नचाहेको आरोप लगाउनुभयो । सर्वोच्च अदालतको परमादेशबाट जन्मिएको वर्तमान गठबन्धन सरकारले जनताका निम्ति कुनै काम गर्न नसकेको उहाँको भनाई थियो । समाजबादको अन्तिम कुरा भनेको नै समृद्ध नेपाल सुखि नेपाली रहेको हुँदा त्यसलाई साकार गर्न एमालेको सरकार आउनु पर्ने बताउनुभयो । उहाँले जनताको बहुदलिय जनवाद भनेको जनता प्रति समर्पित भएको भन्दै जनता प्रति समर्पित पार्टी एमाले मात्र भएको बताउनुभयो । उहाँले अहिलेको गठबन्धन सरकारले जनतालाई वेवास्ता गरेको आरोप लगाउनुभयो ।
उपमहासचिब रिमालले अहिलेको सरकार कमिशनतन्त्रबाट चलेको उहाँको भनाई थियो । अहिलेको सरकारले न्यायधिस नियुक्त गर्दा पनि घुस लिने गरेको आरोप लगाउँदै उहाँले भन्नुभयो–‘जिल्ला न्यायधिस नियुक्त गर्दा र सर्बोच्चको न्यायधिश नियुक्ति गर्न रेट नै तोकेर घुसको बार्गेनीङ गरिएको सुनिएको छ ।’ उहाँले देशको स्वाधिनता, स्वतन्त्रता र आत्मसम्मान जोगाउन पनि आउँदो मंसिर ४ गतेको प्रतिनिधिसभा र प्रदेशसभाको निर्वाचनबाट एमालले जित्नु पर्ने बताउनुभयो । उपमहासचिव रिमालले कानून निर्माण गर्ने काम व्यावस्थापिकाको भए पनि अहिलेको गठबन्धन सरकाले त्यसको विपरित काम गरेको उहँँको भनाई थियो । उहाँले समानुपातीक सांसदमा एक जनालाई एक पटक मात्र अवसर दिनुपर्ने र अर्को पटक भने अर्कोलाई अवसर दिनुपर्ने बताउनुभयो ।
कार्यक्रममा नेकपा एमालेका केन्द्रीय सदस्य तथा मकवानपुर इन्चार्ज रामेश्वर राना, एमाले बागमती प्रदेश कमिटीका उपसचिब महेश कुमार बर्तौला, एमालेका नेता अनन्त पौडेल लगायतकाले आफ्ना धारणा राख्नु भएको थियो । कार्यक्रममा एमाले प्रदेश कमिटीका सदस्य तथा मकवानपुर अध्यक्ष एकालाल श्रेष्ठ, एमालेका प्रदेश कमिटीका सदस्यहरु, जिल्ला समन्वय समिति मकवानपुरका प्रमुख ललित घलान लगायतकाको आतिथ्यता रहेको थियो । कार्यक्रममा मकवानपुर बहुमुखी क्याम्पसका प्रमुख डाक्टर शंकर प्रसाद उपाध्यायले बिष्णु रिमालले प्रस्तुत गर्नु भएको कार्यपत्र माथि टिप्पणी गर्नुभएको थियो । कार्यक्रममा जिल्लाका बिभीन्न क्षेत्रका व्यक्तित्वहरुको सहभागिता रहेको थियो ।
