मकवानपुर – हेटौंडामा बसको ठक्करबाट एकजनाको मृत्यु भएको छ । पुर्व पश्चिम राजमार्ग अन्तर्गत हेटौंडा–९ पशुपतिनगरमा बसको ठक्करबाट एक मोटरसाइकल चालकको मृत्यु भएको हो ।
सोमबार दिउँसो बीरगञ्जबाट हेटौंडा आउँदै गरेको ग १ ख ६१७० नम्बरको बसले बिपरित दिशाबाट जाँदै गरेको बागमती प्रदेश ०३–००२प ९३६२ नम्बरको मोटरसाईकललाई ठक्कर दिँदा मोटरसाइकल चालकको मृत्यु भएको जिल्ला प्रहरी कार्यालय मकवानपुरले जनाएको छ । बसको ठक्करबाट हेटौंडा–१ चाइनाक्वाटरका अन्दाजी ४० वर्षीय अर्जुन घिमिरेको मृत्यु भएको जिल्ला प्रहरी कार्यालय मकवानपुरका निमित्त प्रहरी प्रवक्ता प्रहरी निरीक्षक देवेन्द्र दासले जानकारी दिनुभयो । दुर्घटनामा गम्भीर घाइते भएका उनको उपचारको क्रममा हेटौंडा अस्पतालमा मृत्यु भएको उहाँले जानकारी दिनुभयो । ठक्कर दिने बस प्रहरी नियन्त्रणमा रहेको र चालक भने फरार रहेको प्रहरी निरीक्षक दासले बताउनुभयो ।
