मकवानपुर । मकवानपुरमा बिहीबार मोटरसाईकल दुर्घटनामा परि एकै परिवारका तीनजनाको मृत्यु भएको छ । मकवानपुरको मकवानपुरगढी गाउँपालिका–२ धवाडीपुलमा भएको दुर्घटनामा एकै परिवारका तीनजनाको मृत्यु भएको जिल्ला प्रहरी कार्यालय मकवानपुरले जनाएको छ ।
बिहीबार दिउँसो प्रदेश ३–०२–०१२ प ६९११ नम्बरको मोटरसाइकल आफैँ अनियन्त्रित भई दुर्घटना हुँदा मकवानपुरगढी–२, कुर्लेपाखाका ३५ बर्षीय भिम बहादुर स्याङतान, उहाँकी श्रीमती ३४ बर्षीया रुपा स्याङतान र ५ महिने छोरी मृत्यु भएको हो । रुपा स्याङ्तान र उहाँकी ५ महिनाकी छोरीको घटनास्थलमै मृत्यु भएको थियो । भने, चालक भिम बहादुर स्याङ्तानको उपचारका क्रममा पुरानो मेडिकल कलेज भरतपुरमा मृत्यु भएको जिल्ला प्रहरी कार्यालय मकवानपुरका प्रहरी प्रवक्ता प्रहरी नायव उपरीक्षक लक्ष्मी भण्डारीले जानकारी दिनुभयो ।
गम्भीर घाइते भएका भिम बहादुर घाइते भइ उद्धार गरी हेटौंडा अस्पताल ल्याईएकोमा थप उपचारका लागि पुरानो मेडिकल कलेज भरतपुर चितवन पठाएकोमा बाटोमानै मृत्यु भएको उहाँले बताउनुभयो । सुकौराबाट कान्तिलोकपथ तर्फ आउँदै गरेको मोटरसाइकल आफै अनियन्त्रित भएर सडकबाट करिब १२ मिटर तल खसेर दुर्घटना भएको भएको थियो ।
