चर्च ब्वाइज युनाइटेड शहीद स्मारक ’ए’ डिभिजन लिग फुटबलको शीर्षस्थानमा उक्लिएको छ । ललितपुरको च्यासल मैदानमा भएको खेलमा न्युरोड टिम एनआरटीलाई ४–१ गोलले हराउँदै चर्च ब्वाइज शीर्षस्थानमा उक्लिएको हो ।
चर्च ब्वाइजको जितमा अन्जन विष्टले ह्याट्रिक गरे भने सुशील शाहले एक गोल गरे । एनआरटीका दिपेश आले मगरले एक गोल फर्काए । चर्च ब्वाइज १५ खेलमा २७ अङ्कसहित शीर्ष स्थानमा पुगेको छ । १७ अङ्कसहित एनआरटी दशौँ स्थानमा छ ।
आजै दशरथ रङ्गशालामा भएको खेलमा सातदोबाटो युथ क्लब र मनाङ मर्स्याङ्दी क्लबले गोलरहित बराबरी खेलेका छन् । बराबरीपछि सातदोबाटो २३ अङ्कसहित चौथो र मनाङ १९ अङ्कसहित नवौँ स्थानमा यथावत् छन् । लिगमा अहिले थ्री स्टार क्लब र फ्रेन्ड्स क्लबबीच खेल भइरहेको छ ।
