नेकपा एमाले अध्यक्ष केपी शर्मा ओलीले एमालेको विजय देशको आर्थिक सामाजिक उन्नतिको लागि हुने बताउनुभएको छ । कपिलवस्तुमा आयोजित पार्टी प्रवेश तथा वृहत् जनसभामा ओलीले एमालेले जिते मात्र राष्ट्र समृद्ध भई शिक्षा, स्वास्थ्य, खानेपानी, पूर्वाधारको क्षेत्रमा परिवर्तन आउने बताउनुभयो ।
उपाध्यक्ष विष्णु पौडेलले एमालेको खबरदारीकै कारण स्थानीय तहको निर्वाचन हुन लागेको बताउनुभयो । महासचिव शङ्कर पोख्रेलले आगामी दशकहरूमा केपी ओलीको परिकल्पना अनुसार नेपालको विकास हुने विश्वास व्यक्त गर्नुभयो । सचिव टोप बहादुर रायमाझीले एमालेप्रति जनताको विश्वास बढेको बताउनुभयो ।
एमाले प्रवेशपछि बोल्दै सङ्घीय सांसद वृजेश कुमार गुप्ताले मधेसको विकास र मधेसीको हितमा काम गर्ने दल एमाले मात्र भएको हुँदा कार्यकर्ता सहित प्रवेश गरेको बताउनुभयो । कपिलवस्तु नगरपालिका तौलिहवामा आयोजित वृहत् सभा तथा पार्टी प्रवेश कार्यक्रममा गुप्तासहित हजारौँ समर्थक नेता कार्यकर्ता एमाले प्रवेश गर्नुभएको हो ।
