मकवानपुर– कर्मचारी मिलन केन्द्र मकवानपुरले आज एकै साथ स्वागत, सम्मान र फेरी भेटौंला कार्यक्रम आयोजना गरेको छ । केन्द्रले आज एक कार्यक्रमको आयोजना गरेर जिल्लामा नयाँ आउने कर्मचारीलाई स्वागत, सरुवा भएर जाने कर्मचारीलाई विदाई (फेरी भेटौंला) र संविधान दिवशका अवसरमा विभिन्न पदकबाट सम्मानीत हुने कर्मचारीलाई सम्मान गरेको हो ।
केन्द्रले जिल्ला प्रहरी कार्यालय मकवानपुरका प्रहरी उपरीक्षक शुसील सिंह राठौरलाई सम्मान र शसस्त्र प्रहरी बल २३ नम्बर गुल्मका प्रहरी नायव उपरीक्षक विनोद खतिवडालाई विदाई तथा सम्मान गरेको हो । संविधान दिवशका अवसरमा प्रहरी उपरीक्षक राठौर प्रवल जनसेवा श्री चर्तुथ र प्रहरी नायव उपरीक्षक विनोद खतिवडाले नेपाल प्रभाष सुभुषण विभुषित हुनुभएकोले उहाँहरुलाई केन्द्रले सम्मान गरेको हो ।
त्यस्तै केन्द्रले जिल्लामा नयाँ आउने शसस्त्र प्रहरी बल १४ नम्बर गणका प्रहरी नायव उपरीक्षक भोला गिरी र प्रहरी निरीक्षक निरज पौडेललाई स्वागत गर्नुका साथै सरुवा भएर जान लाग्नुभएका जिल्ला ट्राफिक प्रहरी कार्यालयका प्रमुख हरि विष्णु ढकाललाई विदाई गरेको हो । कर्मचारी मिलन केन्द्रका अध्यक्ष बद्री बहादुर पाठकको अध्यक्षतामा भएको कार्यक्रममा जिल्ला समन्वय समिति मकवानपुरका प्रमुख रघुनाथ खुलाल, उपप्रमुख भगवती पुडासैनी, प्रमुख जिल्ला अधिकारी एवम् मिलन केन्द्रका संरक्षक दिपकराज नेपाललगायत केन्द्रका सदस्यहरूको सहभागिता रहेको थियो ।
