हेटौंडा, माघ २ । ‘तनाव व्यवस्थापनका लागि सकारात्मक सोच’ विषयक अनुशिक्षण कार्यक्रम हेटाैंडामा सम्पन्न भएको छ । मदन भण्डारी फाउन्डेसन जिल्ला शाखा मकवानपुरको आयोजनामा हेटाैंडा–१०, स्थित टाेनी हेगन पार्कमा कार्यक्रम सम्पन्न भएकाे हाे ।
कार्यक्रममा सहभागीलाई मानसिक स्वास्थ्य, दैनिक जीवनमा देखिने तनावका कारण तथा त्यसलाई सकारात्मक सोचमार्फत कसरी व्यवस्थापन गर्न सकिन्छ भन्ने विषयमा व्यवहारिक ज्ञान प्रदान गरिएको थियो । कार्यक्रमलाई सहजीकरण गर्दै विजयराज सिग्देल र रामजी अधिकारीले सकारात्मक सोचको महत्व, आत्म–प्रेरणा, भावनात्मक सन्तुलन तथा तनाव न्यूनिकरणका उपायबारे स्पष्ट पार्नुभयो । उहाँहरूले सरल उदाहरण र अन्तरक्रियात्मक प्रस्तुतीमार्फत सहभागीलाई सक्रिय बनाउँदै तनावमुक्त जीवनशैली अपनाउन प्रेरित गर्नुभयो ।
कार्यक्रमका प्रमुख अतिथि बागमती प्रदेशका प्रथम मुख्यमन्त्री डोरमणि पौडेलले वर्तमान समयमा मानसिक स्वास्थ्यलाई प्राथमिकतामा राख्नु आवश्यक रहेको उल्लेख गर्दै यस्ता अनुशिक्षण कार्यक्रमले समाजमा सकारात्मक सोच र सुदृढ मानसिकता विकासमा महत्वपूर्ण भूमिका खेल्ने बताउनुभयो । उहाँले फाउन्डेसनको निरन्तर सामाजिक–वैचारिक अभियानको प्रशंसा समेत गर्नुभयो ।
मदन भण्डारी फाउन्डेसन जिल्ला शाखा मकवानपुरका अध्यक्ष रघुनाथ खुलालकाे अध्यक्षतामा भएकाे कायर्क्रममा जिल्लाका विभिन्न क्षेत्रका व्यक्तिहरूकाे सहभागिता थियाे । कार्यक्रमले सहभागीहरूमा सकारात्मक ऊर्जा थपेको र व्यवहारिक जीवनमा उपयोगी सन्देश दिएको सहभागीहरूको प्रतिक्रिया दिएका छन ।
