नेकपा एमालेका अध्यक्ष केपी शर्मा ओलीले भर्खरै पुनर्निर्माण सकिएर सञ्चालनमा आएको सिंहदरवारको पश्चिमतर्फको भवन अवलोकन गर्नुभएकाे छ । २०७२ को भूकम्पपछि क्षति पुगेको यो भवन प्रबलीकरण (रेट्रोफिटिङ) गरी केही दिनअघिबाट सञ्चालन गरिएको थियो ।

सिंहदरवार प्रधानमन्त्री कार्यालयभित्रको आर्ट ग्यालरी प्रधानमन्त्री पुष्पकमल दाहाल ‘प्रचण्ड’ र ओलीले संयुक्त अवलोकन गर्नुभएकाे थियाे । आफ्नो पालामा नयाँ डिजाइनसहित पुनः निर्माण गरे पनि बस्न नपाएको कार्यालय उहाँले ‘प्रचण्ड’सँगै अवलोकन गर्नुभएकाे हाे । मध्यपहाडी यात्रामा निस्कनुअघि प्रधानमन्त्रीसँग भेट गर्न सिंहदरवार पुग्नु भएका ओलीलाई ‘प्रचण्ड’ले नयाँ कार्यकक्ष र कार्यालय भवनको अवलोकन गराउनु भएकाे हाे ।

ओलीको पालामा निर्मित अत्याधुनिक कार्यालयको उद्घाटन भने ‘प्रचण्ड’ले गर्नुभएकाे थियाे । अहिले प्रधानमन्त्री कार्यालय त्यहिँबाट सञ्चालन भइरहेको छ । ओलीलाई मुख्य सचिव वैकुण्ठ अर्यालले ब्रिफिङ गर्नुभएकाे थियाे । ओलीले बाहिरी र भित्री कक्षहरूको ‘थ्रिडी एनिमेसन’ सहितको उक्त भवन अवलोकन गर्नु भएकाे छ ।