हेटौँडा – नेकपा माओवादी केन्द्र मकवानपुरका प्रभावशाली नेता एवम् जिल्ला सचिव बलराम बलसहित १२ जना नेकपा एमालेमा प्रवेश गनुभएको छ । एमाले बागमती प्रदेश कमिटीले शुक्रबार आयोजना गरेको कार्यक्रमका बीच माओवादीका अन्य जिल्लास्तरीय नेता कार्यकर्तासहित उहाँहरु पार्टी प्रवेश गर्नुभएको हो ।
उहाँहरुलाई एमाले अध्यक्ष केपी शर्मा ओलीले माला र खादा लगाएर पार्टीमा स्वागत गर्नुभएको हो ।
तत्कालीन जनमोर्चाको जिल्ला अध्यक्ष हुँदै माओवादीको जिल्ला नेतृत्वमा पुग्नुभएका बल २०७४ को स्थानीय तह निर्वाचनमा हेटौंडा उपमहानगरपालिकामा कांग्रेस माओवादी गठबन्धनबाट उपमेयरको उम्मेदवार बन्नु भएको थियो । मकवानपुरको कम्युनिष्ट आन्दोलनका प्रभावशाली नेताको रुपमा रहनु भएका बललाई मकवानपुरे कम्युनिष्ट आन्दोलनको प्रखर वक्ताको रुपमा समेत चिनिदै आएको छ । बलसहित माओवादी प्रतिनिधि सभा २ को प्रदेश सभा (ख) का संयोजक नरेन्द्र रिजाल, राधाकृष्ण रिजाल, बसुन्धारा सुरेन्द्र रिजाल, राज वाइवा, नविन रिजाल, केसर भुजेल, रञ्जन सापकोटा, राधा भुजेल र समिर विष्ट नेकपा एमालेमा प्रवेश गर्नुभएको छ । उहाँहरुले देश र जनताका लागि काम गर्ने केपि ओलि जस्तो नेता अर्को सय वर्ष नपाइने भन्दै ओली नेतृत्वको पार्टीमा समाहित हुन पाउँदा एकदमै खुशी लागेको बताउनु भएको छ ।
