मकवानपुर– हेटौँडामा जारी स्थानीय तह शहीद स्मृति गोल्ड कपमा लिग विजेता मछिन्द्रलाई पराजित गर्दै आयोजक रिगल हेटौँडा रिसोर्ट मकवानपुर ११ फाइनलमा प्रवेश गरेको छ । हेटौंडाको बन विज्ञान अध्ययन संस्थानको खेल मैदानमा बुधवार भएको सेमिफाइनल खेलमा मकवानपुरले लिग विजेता मच्छिन्द्रलाई ४–३ गोल अन्तरले पराजित गरेको हो ।
आज भएको खेलमा आयोजकका तर्फबाट अमिर श्रेष्ठले ४७ र ६९ औ मिनेटमा गोल गरेका थिए भने रुपेश केसीले २० औँ र रञ्जन विष्टले ३५ औँ मिनेटमा गोल गरेका थिए । मच्छिन्द्रका तर्फबाट पूजन उप्रकोटीले १०औँ मिनेटमा अशोक थापाले ५० औँ र राजेश परियारले ६४ औँ मिनेटमा गोल गरेका थिए ।खेलको लिग विजेता मच्छिन्द्रका तर्फबाट गोल गर्दै पूजनले अग्रता दिलाए पनि जित भने आयोजकको पोल्टामा परेको हो । खेलको म्यान अफ द म्याच २ गोल गर्ने मकवानपुरका अमिर श्रेष्ठ भए उनले १० हजार प्राप्त गरेका छन् । उनलाई कार्यक्रमका प्रमुख अतिथि,जिल्ला समन्वय समिति मकवानपुरका प्रमुख रघुनाथ खुलालले पुरस्कार हस्तान्तरण गर्नुभएको थियो ।
प्रतियोगितामा भोलि दोस्रो सेमिफाइनलमा अफ्रिकन रुट्स एसोसिएसन (अरास) डुवल क्यामरुन र आर्मीको भिडन्त हुनेछ । गोल्ड कपमा १० वटा क्लबले सहभागिता जनाएका थिए । प्रतियाेगितामा विदेशी टिम अफ्रिकन रुट्स एसोसिएसन (अरास) डुवल क्यामरुन सहित ए डिभिजन लिगका ६ वटा क्लबहरूले गोल्ड कपमा सहभागिता जनाएका छन् । प्रतियोगिताको विजेताले १० लाख, उपविजेताले ५ लाख र उत्कृष्ट खेलाडीले रोयल एन्फिल्ड मोटरसाइकल प्राप्त गर्नेछन् । यसैगरी विधागत उत्कृष्ट खेलाडीले २५ हजार प्राप्त गर्नेछन् । मकवानपुरका १० वटै स्थानीय तहको प्रायोजन रहेको प्रतियोगिताको फाइनल खेल आगामी चैत्र ७ गते हुने छ ।
