मकवानपुर– मकवानपुर प्रहरीले चोरी भएको मोटरसाइकल सहित मोटरसाइकल चोरी कार्यमा संलग्न ३ जनालाई पक्राउ गरेको छ । प्रहरीले चोरीमा संलग्न सर्लाही जिल्ला बागमती नगरपालिका–१२ का २० बर्षीय टेक बहादुर गोले, सर्लाही लालबन्दी–१४ का २७ वर्षिय जनक तामाङ र सिन्धुलीको मरिण गाउँपालिका–८ का २० बर्षीय निकेस वाईवालाई पक्राउ गरेको हो ।
हेटौडा–१५ का शेर बहादुर पाख्रिनले आफ्नो नाममा दर्ता भएको बागमती प्रदेश ०३–००२ प ०५१६ नम्बरको मोटरसाईकल हेटौँडा–४ स्थित घर अगाडी पार्कीङ गरी राखेको ठाउँबाट चोरी भएको भनि जिप्रका मकवानपुरमा दिएको निवेदनको आधारमा खोजि कार्य गर्दा चोरी भएको मोटरसाइकल सहित उनिहरुलाई पक्राउ गरिएको जिल्ला प्रहरी कार्यालय मकवानपुरका प्रहरी नायब उपरिक्षक इन्द्र बहादुर रानाले जानकारी दिनुभयो । त्यस्तै उक्त मोटरसाइकल चोरीमा संलग्न अर्का एक सिन्धुली मरिण घर बताउने सुरज तामाङको खोजतलास कार्य भईरहेको उहाँले बताउनुभयो । पक्राउ तीनै जना बिरुद्ध मुद्दा दर्ता गरी आवश्यक कारवाही र अनुसन्धान अगाडि बढाइएको उहाँले जानकारी दिनुभयो ।
