मकवानपुर– बागमती प्रदेश सरकारले दैनिक ३ घन्टा सहकारी संस्था खोल्न मातहतका सहकारी संस्थाहरुलाई निर्देशन दिएको छ । प्रदेशको भूमि व्यवस्था, कृषि तथा सहकारी मन्त्रालयलले सुचना जारी गर्दै सहकारीमा बढीमा ३ जना कर्मचारी खटाई दिनमा ३ घण्टा संस्था खोल्न निर्देशन दिएको हो ।
मन्त्रालयले दैनिक ३ घण्टा कार्यालय खुल्ला गरी आफ्नो निक्षेप रकम फिर्ता लिन आउने सदस्यहरुलाई निक्षेप रकम उपलब्ध गराउने व्यवस्था मिलाउन निर्देशन दिएको छ । सरकारले घोषणा गरेको लकडाउनको पूर्ण पालना गर्दै प्रदेश अन्तर्गत मन्त्रालयको अधिकार क्षेत्रभित्र रहेका बचत तथा ऋणको कारोवार गर्ने सहकारी संस्थाहरुलाई आफ्ना सदस्यहरुलाई पर्न सक्ने आर्थिक समस्याबाट बचाउन सुरक्षाको विधि, उपाय तथा सामाजिक दुरी कायम समेत गर्न निर्देशन दिएको छ । वैशाख ११ गतेको मन्त्रीस्तरको निर्णयानुसार विश्वभर फैलिएको कोरोना भाइरसको कारण सहकारी संस्थाहरु बन्द रहेको हुँदा समस्या आउने देखेर उक्त निर्देशन जारी भएको मन्त्रालयका सुचना अधिकारी सुजन कँडेलले जानकारी दिनुभयो ।
