हेटौंडा–आज देखि हेटौंडाको मुख्य बजारमा थोक कारोबार मात्रै गर्न पाइने भएकाे छ । जिल्ला प्रशासन कार्यालय मकवानपुरमा कोराना भाइरस (कोभिड–१९) रोकथाम, नियन्त्रण तथा व्यवस्थापन सम्बन्धमा साेमबार बसेको कमाण्ड पाेष्टकाे हेटौंडाको मुख्य बजारक्षेत्रमा खाद्यान्न तथा तरकारीको थोक कारोबार मात्रै गर्ने गराउने निर्णय गरेको हाे ।
बैठकले मुख्य बजार क्षेत्रमा भइरहेको भीडलाई थप नियन्त्रण गर्न थोक मात्रै कारोबार गराउने र टोलटोलमा रहेका खाद्यान्न तथा तरकारी पसलबाट मात्रै खुद्रा कारोबारको व्यवस्था मिलाउन मकवानपुर उद्योग वाणिज्य संघलाई समन्वयको जिम्मेवारी दिने निर्णय गरेको छ । त्यस्तै बैठकले राष्ट्र बैंकको निर्देशनअनुसार जिल्लाका सबै बैंकहरुलाई सेवा सुचारु गराउने निर्णय गरेको छ । केही बैंकहरु सुचारु नभएको भन्ने जनगुनासो आएकोले बैंकलाई राष्ट्र बैंकको निर्देशनअनुसार सुचारु गराउने निर्णय गरिएको छ ।
त्यस्तै बैठकले राहत वितरणलाई कडाई गर्ने र त्यसका लागि स्थानीय तहहरूले वडा कार्यालयलाई जिम्मेवार बनाउने निर्णय समेत गरेको छ । राहत वितरण जथाभावी भइरहेको भन्दै बैठकले स्थानीय तहमा व्यक्तिगत तथा विभिन्न संघ संस्थाले राहत जम्मा गर्ने र वडा कार्यालयबाट एकद्वार प्रणालीबाट राहत वितरण गर्ने निर्णय गरेको हो । व्यक्तिगत र संस्थागत तवरबाट राहत वितरणको कार्यलाई नियन्त्रण गरी कुनै व्यक्ति वा संस्थाले राहत सहयोग गर्न चाहे सम्बन्धित स्थानीय तह वा वडा कार्यालयमा बुझाउने र त्यसरी बुझाएको राहत सामग्री वडाले व्यवस्थित रुपमा लक्षित समूहलाई वितरण गर्ने निर्णय गरिएको छ ।
त्यस्तै जिल्लामा रहेका एम्बुलेन्सलाई सुरक्षित बनाउन एम्बुलेन्सको पार्टेसन गराउने विषयमा पनि छलफल भएको छ । कोरोना भाइरसको संक्रमण भएको विरामी आए एम्बुलेन्समा लैजाने क्रममा एम्बुलेन्स चालकको सुरक्षाका लागि चालक र पछाडि विरामी राख्ने स्थानबीच सुरक्षित पार्टेसन गर्ने निर्णय भएको छ । प्रमुख जिल्ला अधिकारी दिपकराज नेपालको अध्यक्षतामा बसेको बैठकमा जिल्ला समन्वय समिति मकवानपुर, हेटौंडा उपमहानगरपालिका, जिल्ला स्वास्थ्य कार्यालय, नेपाली सेना, नेपाल प्रहरी, सशस्त्र प्रहरी, उद्योग वाणिज्य संघका प्रतिनिधिको सहभागिता रहेको थियो ।
२०७६/१२/२४ गते बसेकाे कमाण्ड पाेष्टकाे निर्णय
