मकवानपुर । मकवानपुरमा आईतबार बोलेरो पिकअप गाडी दुर्घटना हुँदा एकजनाको मृत्यु भएको छ । मकवानपुरको राक्सिराङ गाउँपालिका–५, चाक्ले बगरमा बोलेरो दुर्घटना हुँदा गम्भीर घाइते भएका कैलाश गाउँपालिका–३ का ५६ वर्षीय शान्तबहादुर गोम्बाको उपचारका क्रममा मृत्यु भएको हो ।
आइतबार दिउँसो मनहरीबाट कैलाश गाउँपालिकातर्फ जाँदै गरेको सु प प्र ०१–००१ च २९४६ नम्बरको बोलेरो ब्रेक फेल भएर दुर्घटना भएको थियो । दुर्घटनामा गम्भीर घाइते भएका गोम्बाको उपचारको क्रममा मनहरी अस्पतालमा मृत्यु भएको जिल्ला प्रहरी कार्यालय मकवानपुरले जनाएको छ । मृतकको शव हेटौँडा अस्पतालको शवगृहमा राखिएको छ । बोलेरोमा ८ जना सवार रहेकोमा ७ जनाको अवस्था सामान्य रहेको र बलेरो चालकको खोजी कार्य भइरहेको प्रहरीले जानकारी दिएको छ ।
