मकवानपुर । बागमती प्रदेशमा अबदेखि अनलाईन बाटै अस्थायी रुट पर्मिट लिन पाईने भएको छ । प्रदेशको श्रम रोजगार तथा यातायात मन्त्रालयले आजबाट लागु हुने गरी अनलाइन रुट रुट पर्मिट लिने व्यवस्था मिलाएको हो ।
प्रदेश सरकारले प्रदेश अन्तर्गतका यातायात व्यवस्था कार्यलयबाट अनलाइनबाटै अस्थायी रुट पर्मिट लिन मिल्ने कार्यको थालनी गरेको छ । मंगलबार बागमती प्रदेशका श्रम, रोजगार तथा यातायातमन्त्री लक्ष्मण लम्सालले अनलाइनबाटै अस्थायी रुट पर्मिट लिने कार्यको शुभारम्भ गर्नुभयो ।
भक्तपुरको सल्लाघारीस्थित यातायात व्यवस्था सेवा कार्यालयमा अनलाइनबाट अस्थायी रुट पर्मिट भुक्तानी प्रणालीको उद्घाटन गर्दै मन्त्री लम्सालले सेवा आरम्भको घोषणा गर्नुभयो । सो क्रममा उहाँले अबदेखि सार्वजनिक तथा भाडाका सवारी साधनलाई एक जिल्लाबाट अर्को जिल्लामा जान आवश्यक अस्थायी रुट पर्मिट लिन कार्यालय धाउनु नपर्ने बताउनुभयो । उहाँले घरमै बसेर सेवाग्राहीले अस्थायी पटके रुट पर्मिटका लागि फाराम भर्ने र कर तिर्ने व्यवस्था मिलाइएको जानकारी दिनुभयो । उहाँले कार्यालयमा नगई अनलाइनमै इजाजतपत्र पाइने व्यवस्थाले सेवाग्राहीलाई सुविधा हुने विश्वास व्यक्त गर्नुभयो ।
मन्त्रालयले सेवाग्राहीलाई कार्यालयनै आउन नपर्ने गरी यातायातसम्बन्धी सवारीचालक अनुमतिपत्र नवीकरण र सवारी कर तिर्न पनि माघ १६ गतेबाट अनलाइन व्यवस्था लागु गरिएको समेत जानकारी दिनुभयो । तर अझै पनि अधिकांश सेवाग्राही सो सेवाको प्रयोग नगरी कार्यालयमा घण्टौं लगाएर लाइनमै कर तिर्न आइरहेकोप्रति आश्चर्य व्यक्त गर्नुभयो । अनलाइनबाट यातायातसम्बन्धी छाप भएका कागजात दिने व्यवस्था लागु गर्ने मन्त्री लम्सालले प्रतिबद्धता समेत व्यक्त गर्नुभयो ।
