मकवानपुर– मकवानपुरमा आज दिउँसो भएको बस दुर्घटनामा मृत्यु हुनेको सङ्ख्या ७ पुगेको छ । दुर्घटनामा २४ जना घाइते भएका छन् । छ जनाको घटनास्थलमै र एक जनाको भीमफेदी प्राथमिक स्वास्थ्य केन्द्रमा उपचारका क्रममा मृत्यु भएको जिल्ला प्रहरी कार्यालय मकवानपुरका प्रहरी उपरिक्षक बामदेव गौतमले जानकारी दिनुभयो ।
काठमाडौँबाट हेटौँडातर्फ आउँदै गरेको ना ३ ख ७८५८ नम्बरको बस भीमफेदी गाउँपालिका-६ जुरिखेतमा दुर्घटना भएको हो । बस दुर्घटनाग्रस्त हुँदा हेटौँडाबाट काठमाडौँ जाँदै गरेको मधेस प्रदेश–०३–००१ ज ०२७१ नम्बरको सुमोमा ठोक्किएको थियो । प्रहरी उपरीक्षक गौतमका अनुसार मृतक सबै पुरुष भएको र ३० देखि ४० बर्ष उमेर समूहको रहेका छन् । घुमाउरो बाटोमा दुर्घटना हुँदा भई बस ५० मिटर तल तल्लो सडकमा खसेको प्रहरीले जनाएको छ । दुर्घटनामा घाइतेहरूलाई अस्पताल पठाइएको साथै मृतकको सनाखत हुन बाकी रहेको उहाँले जानकारी दिनुभयो ।
