काठमाण्डौ – १३ औँ दक्षिण एसियाली खेलकुद (साग) अन्तर्गत पुरुष भलिबलको सेमिफाइनल समीकरण पूरा भएको छ ।
समूह चरणको अन्तिम खेलमा पाकिस्तानले श्रीलंकामाथि ३–१ ले जितेपछि पाकिस्तान समूह विजेताको रुपमा सेमिफाइनलमा प्रवेश गरेको हो । पराजित भएको श्रीलंका भने उपविजेताको रुपमा सेमिफाइनलमा प्रवेश गरेको छ ।
पाकिस्तानले फाइनल प्रवेशका लागि बंगलादेश तथा श्रीलंकाले भारतसँग खेल्ने छन् । पहिलो सेट ३०–२८ ले जितेको श्रीलंकाले त्यसपछि लगातार तीन सेट गुमाउँदै समूह चरणको उपविजेतामा बन्यो ।
त्रिपुरेश्वर कभर्डहलमा पहिलो सेटको निकै प्रतिस्पर्धात्मक खेल श्रीलंकाले ३०–२८ ले जितेको हो । २५–२४ हुँदा पाकिस्तानले स्कोर बराबरी गर्दै २५–२५ मा ल्याएको थियो । त्यसपछि पाकिस्तानले अंक थप्दै २६–२५ बनाए पनि श्रीलंकाले कमब्याक गरेको थियो । त्यसैगरी २७–२७ र २८–२८ भएका बेला श्रीलंकाले लागातार २ अंक थप्दै ३०–२८ ले पहिलो सेट आफ्नो पक्षमा पर्न सफल भयो ।
दोस्रो सेटमा भने पाकिस्तान खेलमा फर्कन सफल भयो । सुरुदेखि नै श्रीलंकामाथि दबाब बनाएको पाकिस्तानसामु श्रीलंका सर्भिस, ब्लक र रिसिभ सबैमा कमजोर देखिएको थियो । दोस्रो सेटमा पाकिस्तान २५–१८ ले विजयी भयो ।
तेस्रो सेट पनि निकै प्रतिस्पर्धात्मक रुपमा सम्पन्न भयो । जसमा पाकिस्तानले २५–२० ले आफ्नो पक्षमा पार्दै सेटमा २–१ को अग्रता लिन सफल भयो । सुरुदेखि नै स्कोर लेभल गर्दै अघि बढेको पाकिस्तानले श्रीलंकालाई १५ मा रोक्दै स्कोर २१ सम्म पुर्याएकाे थियो । त्यसपछि श्रीलंका खेलमा फर्केर २० सम्म पुगे पनि पाकिस्तानले २५–२० ले तेस्रो सेटमा जित हात पार्न सफल भयो ।
चौथो सेटमा पनि पाकिस्तान र श्रीलंका दुवैले उत्कृष्ट खेल देखाएका थिए । सुरुदेखि स्कोर लेभल गर्दै अघि बढेका दुवै टिमले अन्तिमसम्म प्रतिस्पर्धा गरे । श्रीलंकाको १९ तथा पाकिस्तानको २१ अंक हुँदा रेफ्रीको गल्तीका कारण पाकिस्तानले थप अंक जोडेको थियो । जसका कारण उसलाई सोही अंकले फाइदा पुग्यो ।
अन्तिम समयमा दबाबमा परेको श्रीलंकाले सर्भिस बिगार्दा पाकिस्तान २५–२१ ले विजयी हुन पुग्यो ।
