पूर्व प्रधानमन्त्री तथा नेकपा (एमाले) का अध्यक्ष केपी शर्मा ओलीले समुद्री सतहदेखि दुई हजार १०० मिटर उचाइमा रहेको दक्षिण एसियाकै नमुना घले गाउँलाई सुखी गाउँ घोषणा गर्नुभएको छ । लमजुङ क्व्होलासोथर गाउँपालिका–३ मा रहेको पर्यटकीय यस गाउँलाई आज एक कार्यक्रमबीच उहाँले घले गाउँलाई सुखी गाउँ घोषणा गर्नुभयो । हेलिकप्टरमार्फत घले गाउँ आउनुभएका अध्यक्ष ओलीले आधुनिक गाउँ र स्मार्ट भिलेका रूपमा घले गाउँ अघि बढ्नुपर्ने बताउनुभयो ।
उहाँले भन्नुभयो, “घले गाउँ घरवासले नयाँ ढङ्गले विकास गरेको छैन, अरूका लागि पनि उदाहरणीय बनेको छ, घले गाउँबाट सिक्न जरुरी छ ।” अध्यक्ष ओलीले घले गाउँमा रहेको उत्तरकन्य प्राविलाई आधुनिकीकरण र प्रविधियुक्त विद्यालय बनाउनुपर्ने बताउनुभयो । काम नगरी बस्ने, खानेलाई सुखी नभनी गाउँमा बसी आफैँ उत्पादन गर्ने, आत्मनिर्भर बन्ने र आर्थिक रूपमा बलियो भएकाले यस गाउँलाई सुखी गाउँ भनिएको घले गाउँ क्व्होलासोंथर गाउँपालिका अध्यक्ष प्रेमबहादुर घलेले बताउनुभयो । उहाँले भन्नुभयो, “सहरमा पाउने सुविधा घले गाउँ पाउन सकिन्छ । सडक, बिजुली, टेलिफोन, इमेल, इन्टरनेट, घरघरमा खानेपानी, शौचालय, विद्यालय, आधारभूत स्वास्थ्य सेवा लगायतको सुविधा पुगेको छ । स्थानीयले पर्यटन विकास गरी सुखी भएको र आनन्दका साथ बसेकाले सुखी गाउँ भनिएको हो ।”
एक सय ३० घरधुरी रहेको यहाँ सबै एकै प्रकारको रातो रङको जस्ता पाताको छानो छ । विसं २०५७ वैशाख २३ गते प्रथम महोत्सव गरी घले गाउँमा १२ घर घरवास (होमस्टे) स्थापना गरेको यहाँ यति बेला ४२ घरमा घरवास कार्यक्रम रहेको छ । होमस्टेमा एकै प्रकारको आरामदायी कोठा छन् । सडक, बिजुली, टेलिफोन, इन्टरनेट, खानेपानी, विद्यालय, स्वास्थ्यलगायत आधारभूत सुविधापछि घले गाउँ २०७६ साल मङ्सिर १७ गते स्मार्ट भिलेज घोषणा भएको थियो । गाउँ पर्यटन प्रवर्द्धन मञ्च (भिटोफ) ले नेपालकै उत्कृष्ट होमस्टेको रूपमा पुरस्कृत समेत गरेको थियो ।
त्यस्तै, सो अघि दुई पटक दक्षिण एसियाकै नमुना घले गाउँ घोषणा भइसकेको छ । जिल्लाकै सबैभन्दा बढी पर्यटक यस गाउँमा आउने गर्दछन् । होमस्टे सञ्चालकले प्रतिमहिना ४० देखि ६० हजार रुपैयाँ आम्दानी गर्दै आएका छन् । होमस्टे सञ्चालन गरिएको ४२ घर बाहेक अन्य घरका बासिन्दाले पर्यटकका लागि आवश्यक अन्न, तरकारी, फलफूल, मासु, अण्डालगायत उत्पादन र स्वरोजगारमा जीवनयापन गर्दै आएका छन् । केही चोया, ऊन, अल्लोलगायतबाट हस्तकलाका सामग्री तयार पार्छन् । केहीले व्यावसायिक पसल चलाएका छन् । भेँडाको लागि गाउँलेको आफ्नै गोठ छ । घुम्ती पशुपालन र कृषिबाट पनि गाउँलेले आम्दानी गरेका छन् । केही वैदेशिक रोजगारीमा पनि छन् ।
एमालेका तत्कालीन अध्यक्ष मनमोहन अधिकारी प्रधानमन्त्री तथा नेता भरतमोहन अधिकारी अर्थमन्त्री हुँदा ‘आफ्नो गाउँ आफैँ बनाऔँ’को नारालाई सार्थक बनाउने परिकल्पना थाले अनुरूप नै घले गाउँलाई आज सुखी गाउँ बनाउन सफल भएको बताइएको छ । रासस
