हेटाैंडा– मकवानपुर प्रहरीले लागूऔषध चरेशसहित ३ जनालाइ पक्राउ गरेकाे छ । प्रहरीले थाहा नगरपालिका–७, खर्क स्थित सडक खण्डमा लागूऔषध चरेशसहित तीनजना र एउटा अटोलाई नियन्त्रणमा लिएकाे हाे ।
आइतबार बिहान साढे ६ बजेको समयमा थाहा नगरपालिकाको चित्लाङबाट काठमाडौंको चन्द्रागिरी नगरपालिकातर्फ जाँदै गरेको प्र. नं. ३–०३–००१ ह ०२५९ नम्बरको अटोबाट मकवानपुर प्रहरीले चरेश बरामद गरेको जनाएको छ । प्रहरीले लागूऔषध चरेशसहित अटोमा सवार थाहा नगरपालिका–७ महादेवखर्कका ३० वर्षीय शुभराज घलान, छापटोलका ३३ वर्षीय नारायण सिं मुक्तान र फेदीगाउँ देउरालीका ४७ वर्षीय अटोचालक कृष्ण बहादुर गुरुङलाई नियन्त्रणमा लिएको जनाएको छ । अटोको सिट मुनी लुकाई राखेको अवस्थामा १२ केजी ९३२ ग्राम चरेशसहित उनिहरूलाइ नियन्त्रणमा लिइएकाे जिल्ला प्रहरी कार्यालय मकवानपुरका प्रवक्ता ईन्द्रबहादुर रानाले जानकारी दिनुभएको छ । उनिहरूलाइ लागूऔषध नियन्त्रण ऐन, २०३३ बमोजिम २ वर्षदेखि १० वर्षसम्म कैद र १५ हजार देखि १ लाख रुपैयाँसम्म जरिवाना हुने बताइएकाे छ ।
