मकवानपुर– मकवानपुरको मकवानपुरगढी गाउँपालिका–२ मा जन्ति बोकेको बस दुर्घटना हुँदा ३ जनाको मृत्यु भएको छ । दुर्घटनामा अन्य दर्जनौ घाईते भएका छन् । कान्ति लोकपथ अन्तर्गत मकवानपुरको मकवानपुरगढी गाउँपालिका–२ शिखरकटेरी नजिक जन्ति बस दुर्घटना हुँदा ३ जनाको मृत्यु भएको हो ।
दुर्घटनामा हाल सम्म ३ जनाको ज्यान गएको तथा अन्य दुई दर्जन भन्दा बढी घाइते भएको जिल्ला प्रहरी कार्यालय मकवानपुरले जनाएको छ । बस भित्र च्यापिएको अवस्थामा २ जनालाई जेसिविको सहयोगमा बाहिर निकालिएको प्रहरीले जनाएको छ । मृत्यु हुनेमा गढी–७ बस्ने वर्ष ३५ को सोमबहादुर रुम्बा र सोही ठाउँ बस्ने वर्ष २९ को सोमबहादुर मोक्तान रहेको प्रहरीले जनाएको छ । बाँकी २ जनाको अहिलेसम्म सनाखत भएको छैन् ।
गाउँपालिका अध्यक्ष विदुर हुमागाईंका अनुसार बकैया–११, घट्टेबाट दुलही लिएर गढी–७, सुकौरा, कन्यातर्फ आउँदै गरेको ना ३ ख ३५५६ नम्बरको बस मकवानपुरगढी गाउँपालिका–२ शिखरकटेरी नजिक दुर्घटनामा परेको हो। दुर्घटनामा घाइतेको हेटौंडा अस्पताल र चुरे हिल अस्पतालमा उपचार भईरहेको जिल्ला प्रहरी कार्यालय मकवानपुरका प्रहरी उपरिक्षक सुशिल सिंह राठौरले जानकारी दिनुभयो ।
