हेटाैंडा– आज थप ५८ जना कोरोना भाइरस संक्रमण मुक्त भई घर फर्किएका छन् । स्वास्थ्य तथा जनसंख्या मन्त्रालयको आजको नियमित प्रेस व्रिफिङ्मा मन्त्रालयका प्रवक्ता प्रा.डा. जागेश्वर गौतमले आज विभिन्न स्थानमा रहेका आइसोलेसन सेन्टरबाट ५८ जना संक्रमण मुक्त भएपछि संक्रमण मुक्त भई घर फर्किनेको कूल संख्या ११ हजार ६ सय ९५ पुगेको जानकारी दिनुभयो ।
नेपालमा हाल सम्म कोरोना भाइरसको संक्रमण मुक्त भई स्वास्थ्यलाभ गर्नेको दर ६६ दशमलव २४ प्रतिशत रहेको प्रवक्ता प्रा.डा. गौतमले बताउनुभयो । यसैगरी, आज देशका विभिन्न स्थानमा रहेका २७ वटा प्रयोगशालामा ३ हजार ७ सय ४१ जनाको रियल टाइम पिसिआर विधिबाट परीक्षण गर्दा एक सय ५६ जनामा कोरोना भाइरसको संक्रमण पुष्टि भएको छ । मन्त्रालयले दिएको जानकारी अनुसार नेपालमा हालसम्म १७ हजार ६ सय ५८ जना कोरोना भाइरसबाट संक्रमित भएका छन् । देशका विभिन्न स्थानमा रहेका क्वारेन्टाइनमा आज २२ हजार ६ सय ६२ जना रहेको मन्त्रालयका प्रवक्ता प्रा.डा. जागेश्वर गौतमले जानकारी दिनुभयो ।
