हेटाैंडा । मदन भण्डारी फाउण्डेसन मकवानपुरले बिहीबार ३१औं मदन आश्रीत स्मृति दिवस मनाएको छ । एमालेका तत्कालीन महासचिव मदन भण्डारी र संगठन विभाग प्रमुख जीवराज आश्रितको ३१औँ स्मृति दिवसका अवसरमा आज हेटौंडा–९, स्थित दिव्य बाल उद्यानमा स्मृति तथा श्रद्धाञ्जली सभा कार्यक्रमको आयोजना गरेर स्मृति दिवस मनाइएको हो ।
मदन भण्डारी फाउन्डेसन मकवानपुरका अध्यक्ष रघुनाथ खुलालको अध्यक्षता एवम् एमाले केन्द्रिय सदस्य केदार न्यौपानेको प्रमुख आतिथ्यतामा भएको कार्यक्रममा मदन–आश्रितको सालिकमा माल्यार्पण गर्नुका साथै मदन आश्रितको बारेमा चर्चा गरिएएको थियो । कार्यक्रममा सहभागीहरुले जननेता मदन भण्डारीको प्रतिमामा माल्यार्पण गर्नु भएको थियो ।
कार्यक्रममा बोल्दै प्रमुख अतिथि न्यौपानेले नेपालको कम्युनिस्ट आन्दोलनमा मदन–आश्रितको योगदान सधै सम्झिरहने बताउनुभयो । जननेता मदन भण्डारी र कुशल सङ्गठक जिबराज आश्रीतबाट सबैले प्रेरणा लिनुपर्ने उहाँको भनाई थियो । कार्यक्रममा एमाले बागमती प्रदेश सदस्य गोपाल श्रेष्ठ, बागमती प्रदेश सभा सदस्य तथा नेकपा एमाले जिल्ला कमिटी मकवानपुरका अध्यक्ष एकालाल श्रेष्ठलगायतको उपस्थिती थियो ।
मदन भण्डारी फाउण्डेसन मकवानपुरले तीन दिवशीय कार्यक्रम गरेर ३१औं मदन–आश्रित स्मृति दिवश मनाएको छ । दिवशका अवसरमा पहिलो दिन जेठ १ गते ५ किलो मिटर पुरुष खुल्ला दौड प्रतियोगिता, जेठ २ गते मावि स्तरीय हाजिरी जवाफ प्रतियोगिता र मुख्य दिन आज स्मृति तथा श्रद्धाञ्जली सभा कार्यक्रम आयाेजना गरेकाे थियाे । नेकपा एमालेका तत्कालिन महासचिव मदन भण्डारी र संगठन विभाग प्रमुख जीवराज आश्रितको २०५० जेठ ३ गते चितवनको दासढुंगामा जीप दुर्घटनामा परी मृत्यु भएको थियो । मदन आश्रितको स्मृतिमा जेठ ३ गते विभिन्न कार्यक्रम गरी स्मृति दिवस मनाउने गरिन्छ ।
