राक्सिराङ्ग । मकवानपुरको बिकट राक्सिराङ्ग गाउँपालिकामा स्थानीय उत्पादन कृषि उपज तथा रैथाने बाली बिक्री केन्द्र स्थापना भएको छ । गाउँघरमै उत्पादित रैथाने कृषि उपजहरुलाई बजारीकरण गर्ने उदेश्यका साथ राक्सिराङ्ग गाउँपालिका–८, स्थित हिमाली देबिटार कृषि सहकारी संस्था लिमिटेडले स्थानीय उत्पादन कृषि उपज तथा रैथाने बाली बिक्री वितरण र संकलन केन्द्र स्थापना गरेको हो ।
संस्थाको चौथो बार्षिक साधारण सभाको अवसरमा मंगलबार गाउँपालिका अध्यक्ष राजकुमार मल्लले उक्त केन्द्रको उद्घाटन गर्नु भयो । केन्द्रको उदघाटन गर्दै अध्यक्ष राजकुमार मल्लले संस्थाले राम्रो कामको शुरुवात गरेको भन्दै रैथाने बालीको उत्पादन बढाउन आग्रह गर्नुभयो । उहँँले संकलन केन्द्रमा रैथाने कृषि सामाग्रीको अभाव कहिल्यै हुन नदिन आग्रह गर्दै लोप हुदैँ गएका रैथाने बालीहरुको संरक्षण र उत्पादन बृद्धि गर्न गाउँपालिकाले अनुदानको ब्यवस्था गर्ने बताउनुभयो । उहाँले कृषि उपज उत्पादन भई संकलन गर्न सके पर्यटन क्षेत्रमा समेत यसले टेवा पुग्ने उहँँले बताउनुभयो । उहाँले निकट भविष्यमै गाउँपालिकाले कृषि एम्बुलेन्स चलाउने भन्दै उहाँले रैथाने बाली, कृषि उपजहरुलाई बजारीकरणको लागि ब्राण्डिङ्ग गर्दै लैजाने समेत बताउनुभयो ।
गत आर्थिक बर्ष २०७९÷८० मा विनियोजित ८ लाख रुपैयाको बजेटबाट ३ कोठाको भवनमा सहकारी संस्थाले रैथाने बाली बिक्री वितरण र संकलन केन्द्र स्थापना गरेको हो । संकलन केन्द्रमा संस्थाले मकैको पिठो, गुन्द्रुक, चिउरीको पिना, घ्यु, वन तरुल, कोदोको पिठो, फापरको पिठो, तोरी, मास, मस्याङ, केरा, गहत, जुनेलो, डोको, मान्द्रो, तामा, पिडालु, सिमल तरुल लगायत २० प्रकारको स्थानीय उत्पादन बिक्रिको लागि राखेको छ ।
“हाम्रै गाउँघरमा उत्पादित रैथाने बाली तथा कृषि उपज संकलन गरेर बिक्रिका लागि राखेका छौं । कृषकले उत्पादन गरेको बालीलाई बजार भाउमै गाउँमै खरिद गरि ब्यवसायीकरण गर्ने सहकारीको लक्ष्य छ । मौलिक र रैथाने बालीलाई ठुला ठुला बजारसम्म पुर्याउन पहल समेत भइरहेका छन ।” उहाँले भन्न्ुभयो ।
कार्यक्रममा वडा नम्बर ८ का युसाई प्रजा, गाउँपालिकाको कृषि शाखाका प्रमुख कृष्ण डुम्रे, वडाका सब इन्जिनियर मनोज प्रजा, राष्ट्रिय जनवकालत मन्च (नाफान) का सन्तोष थापा लगायतको आतिथ्यता रहेको थियो । संस्थालाई गाउँपालिका, राष्टिय जनवकालत मञ्च नाफान लगायत संस्थाले सहयोग समेत गरेको छ ।
