सत्तारूढ पाँच दलीय गठबन्धनको बैठकले जिल्ला समन्वय समितिमा गठबन्धनको बिचमा सहमति गरी अगाडि बढ्न निर्देशन गरेको छ । सत्तारूढ पाँच दलीय गठबन्धनको प्रधानमन्त्री निवास बालुवाटारमा बसेको बैठकले ७७ वटा जिल्ला समन्वय समितिमा गठबन्धनको बिचमा सहमति गरी अगाडि बढ्न आ–आफ्ना दलका प्रदेश र जिल्ला समितिहरूलाई निर्देशन दिने निर्णय गरेको बैठकमा सहभागी सञ्चार तथा सूचना प्रविधि मन्त्री ज्ञानेन्द्रबहादुर कार्कीले जानकारी दिनुभयो ।
बैठकले बाँकी रहेका पालिकाको कार्यपालिका सदस्यको निर्वाचनमा पाँच दलीय गठबन्धनको बिचमा सहमति गरेर अगाडि बढ्ने निर्णय गरेको छ । बैठकमा स्थानीय तहको निर्वाचनको परिणामबारे पनि छलफल भएको थियो । सञ्चार मन्त्री कार्कीले गठबन्धन देशको आवश्यकता भएकाले आवश्यकता पूरा नहुँदासम्म कायमै रहने बताउनुभयो । मन्त्री कार्कीले संविधानले परिकल्पना गरेको समय सीमाभित्र नै आवधिक निर्वाचन हुने स्पष्ट पार्नुभयो ।
बैठकमा प्रधानमन्त्री शेरबहादुर देउवा, नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’, नेकपा (एकीकृत समाजवादी) का अध्यक्ष माधवकुमार नेपाल, जनता समाजवादीका अध्यक्ष उपेन्द्र यादव, कांग्रेस वरिष्ठ नेता रामचन्द्र पौडेल, नेकपा एकीकृत समाजवादीका नेता झलनाथ खनाल, नेकपा माओवादी केन्द्रका नेता नारायणकाजी श्रेष्ठ, काँग्रेसका उपसभापति पूर्णबहादुर खड्का, कांग्रेस नेता कृष्णप्रसाद सिटौला, सञ्चार तथा सूचना प्रविधि मन्त्री कार्की, राष्ट्रिय जनमोर्चाका उपाध्यक्ष दुर्गा पौडेल लगायतको उपस्थिति थियो ।
