हेटौंडा – आसन्न स्थानिय तहको निर्वाचनमा नेपाल परिवार दलले मकवानपुर जिल्लामा नेकपा एमालेसँग तालमेल गर्ने पक्का भएको छ । आइतबार नेकपा एमाले मकवानपुरको पार्टी कार्यालयमा भएको छलफलमा नेपाल परिवार दलले केही वडामा सुर्य चिन्हबाट उम्मेदवारी समेत दिने तय भएको छ ।
नेपाल परिवार दल मकवानपुरका अध्यक्ष हरि बहादुर लोप्चन र एमाले मकवानपुरका अध्यक्ष एकलाल श्रेष्ठबिच भएको छलफलमा नेपाल परिवार दलले मकवानपुरमा ३ वडामा १÷१ जना वडा सदस्यको लागि स्थान माग गरेको छ । दलले हेटौंडा–१०, मनहरी–६ र कैलाश–८ मा वडा सदस्य माग गरेको जनाएको छ । जसमा कैलास ८ बाट नेपाल परिवार दलका जिल्ला अध्यक्ष हरिबहादुर लोप्चनको नाम वडा सदस्यमा एमालेको वडा कमिटीले नै समावेश गर्दै सिफारिस गरिसकेको छ ।
यस्तै हेटौंडा–१० र मनहरी–६ मा पनि सदस्य पद माग गरेको सन्दर्भमा भने अहिले नै भन्न नसकिने एमाले अध्यक्ष श्रेष्ठले बताउनुभयो । अन्य नेताहरुसँग पनि छलफल गर्नुपर्ने तथा वडा कमिटीमा पनि जानकारी गराउन पर्ने भएकाले उक्त वडाहरुको बिषयमा केही दिनमा टुङ्गो लाग्ने उहाँको भनाई छ ।
