काठमाडौँ । सभामुख अग्निप्रसाद सापकोटाले बोलाउनुभएको सर्वदलीय बैठक अहिले बसिरहेको छ ।बैठकमा संसद्को गतिरोध अन्त्य तथा अमेरिकी सहयोग परियोजना (एमसीसी) लगायतका विषयमा छलफल हुनेछ । संसदमा प्रतिनिधित्व गर्ने दलका नेतालाई छलफलमा बोलाइएको भएपनि प्रमुख प्रतिपक्षी दल नेकपा एमालेका नेताहरू भने सहभागी हुनुभएको छैन ।
बैठकमा नेपाली काँग्रेसका सभापति एवं प्रधानमन्त्री शेरबहादुर देउवा, नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’, नेकपा (एकीकृत समाजवादी)का अध्यक्ष माधवकुमार नेपाल, जनता समाजवादी पार्टीका अध्यक्ष उपेन्द्र यादव, जनमोर्चा संसदीय दलका नेता दुर्गा पौडेल र नेमकिपा सांसद प्रेम सुवाल सहभागी हुनुहुन्छ । बैठकमा माओवादीको संसदीय दलका प्रमुख सचेतक देवप्रसाद गुरुङ, परराष्ट्रमन्त्री नारायण खड्का, गृहमन्त्री बालकृष्ण खाँणलगायत सहभागी हुनुहुन्छ ।
